Мамандардың айтуынша, күз-қыс мезгілінде респираторлық инфекциялардың таралу қаупі артады. Сондықтан аурудың алдын алу шараларын сақтау, алғашқы белгілер пайда болған жағдайда денсаулыққа мұқият қарау және дәрі-дәрмекті өз бетінше қабылдамау маңызды.
Тұмау мен ЖРВИ-ден қалай қорғануға болады?
Фармация комитеті инфекциялық аурулардың алдын алу үшін қарапайым сақтық шараларын ұстануға кеңес береді. Атап айтқанда, жеке бас гигиенасын сақтау, қолды жиі жуу, бөлмелерді тұрақты желдету және ауру белгілері бар адамдармен жақын байланыстан аулақ болу қажет.
Егер адамда жөтел, тамақ ауруы, мұрыннан су ағу немесе дене қызуының көтерілуі сияқты белгілер байқалса, өзгелермен қарым-қатынасты шектеген жөн.
Сонымен қатар медицина қызметкерлерінің ұсынымдарын орындап, тұмауға қарсы вакцинация мәселесіне жауапкершілікпен қарау ұсынылады.
Үйдегі дәрі қобдишасында қандай дәрілер болуы керек?
Мамандар маусымдық ауруларға дайын болу үшін үйдегі дәрі қобдишасында алғашқы көмекке қажетті дәрілік заттар мен медициналық құралдардың болғаны дұрыс екенін атап өтті.
Олардың қатарында дене қызуын түсіруге және ауырсынуды басуға арналған парацетамол (500 мг), сондай-ақ ауырсыну мен қабынуды азайтуға көмектесетін ибупрофен (200–400 мг) бар.
Мұрынның шырышты қабатын шаю және ылғалдандыру үшін натрий хлоридінің изотоникалық ерітіндісін қолдануға болады. Ал мұрын қатты бітелген жағдайда дәрігер немесе фармацевт ұсынған тамыр тарылтатын препараттар пайдаланылуы мүмкін.
Бұдан бөлек, ағзадағы сұйықтық пен электролиттердің орнын толтыруға арналған регидратациялық ерітінділер мен дене қызуын өлшейтін термометр болғаны жөн.
Алайда аталған дәрілердің барлығы бірдей әр адамға жарай бермейді. Әсіресе балаларға, жүкті әйелдерге және созылмалы аурулары бар адамдарға дәрі таңдағанда маманмен кеңесу қажет. Көрсетілген мөлшерлерді дәріні қабылдауға арналған жеке нұсқаулық ретінде қарастыруға болмайды.
Антибиотиктер тұмауды емдей ме?
Фармация комитеті тұрғындарға антибиотиктерді дәрігердің тағайындауынсыз қабылдамауды ескертті.
Мамандардың түсіндіруінше, тұмау мен ЖРВИ-дің басым бөлігі вирустардан туындайды. Ал антибиотиктер вирустарға әсер етпейді және тек бактериялық инфекцияларды емдеу үшін қолданылады.
Антибиотиктерді негізсіз пайдалану бактериялардың дәріге төзімділігін арттырып, жағымсыз реакциялар мен басқа да асқынуларға әкелуі мүмкін.
Сондай-ақ рецептімен берілетін вирусқа қарсы препараттарды да өз бетінше қабылдауға болмайды.
Мамандар бірнеше дәріні қатар қолданған кезде олардың құрамына ерекше назар аударуға шақырады. Өйткені суық тиюге қарсы кейбір кешенді препараттардың құрамында парацетамол болуы мүмкін. Оны басқа дәрілермен бірге шамадан тыс қабылдау бауырға ауыр зиян келтіруі ықтимал.
Қандай жағдайда дәрігерге қаралу қажет?
ЖРВИ жеңіл түрде өткен жағдайда науқасқа жеткілікті демалу, сұйықтық ішу және белгілерді жеңілдетуге бағытталған ем көмектесуі мүмкін.
Алайда дене қызуы ұзақ уақыт түспесе, тыныс алу қиындаса, кеуде тұсы ауырса немесе жағдай жақсарғаннан кейін қайта нашарласа, медициналық көмекке жүгіну қажет. Тыныс алудың айқын қиындауы немесе кеуденің қатты ауыруы кезінде шұғыл медициналық көмек шақырған жөн.
Әсіресе ерте жастағы балалар, егде жастағы адамдар, жүкті әйелдер және созылмалы аурулары бар азаматтар өз денсаулығына ерекше көңіл бөлуі тиіс. Бұл топтағы адамдарда респираторлық инфекциялар асқыну қаупін арттыруы мүмкін.
Денсаулық сақтау министрлігі мамандарының негізгі кеңесі – аурудың алдын алу шараларын сақтау, дәрілерді жауапкершілікпен пайдалану және денсаулық жағдайы нашарлаған кезде емдеуді кешіктірмеу.
Мамандар тұмау мен ЖРВИ маусымында өз бетінше емделудің орнына, қажет болған жағдайда дәрігер кеңесіне жүгінудің маңызды екенін еске салады.
