Мемлекет басшысы Қазақстанда Шавкат Мирзиёевті Өзбек елінің нағыз көшбасшысы, халықаралық деңгейдегі саясаткер, екі халық арасындағы достық пен ынтымақтастықты нығайтуға өлшеусіз үлес қосқан көрнекті мемлекет қайраткері ретінде танитынын және құрметтейтінін айтты.
– Егемен ел ретінде даму жылдарында екі мемлекет арасында жан-жақты серіктестік пен стратегиялық одақтастық жолға қойылды. Берік шарттық-құқықтық база қалыптасты. Шекараны толықтай шегендеп алдық. Өзара сенімді саяси диалогтың арқасында біз сауда-экономикалық және мәдени-гуманитарлық байланыстарды қарқынды түрде ілгерілетіп келеміз. Негізгі халықаралық құрылымдар аясында тығыз ықпалдастық орнаттық. Бір сөзбен айтқанда, қазіргі қазақ-өзбек қатынастары үлгі етуге тұрарлық әрі нағыз бауырластық деңгейде, – деді Президент.
Шавкат Мирзияев Қасымжомарт Тоқаевқа және бауырлас қазақ халқына Қазақстанның жоғары мемлекеттік наградасын тапсырғаны үшін алғысын білдірді.
– Бұл марапатты екі халықтың шынайы достығы мен тату көршілігінің ғасырлар бойғы байланыстарын нығайту жөніндегі бірлескен күш-жігеріміздің жоғары бағасы деп санаймын. Қазақстан-біздің ең жақын, сенімді және уақыт сынынан өткен серіктесіміз, — деп атап өтті Өзбекстан Президенті.
