Қазақстан Президенті Қасым-Жомарт Тоқаев Украинадағы жағдайдың ушығуына байланысты азаматтық және әскери нысандардың қауіпсіздігін қамтамасыз ету бойынша шұғыл шаралар қабылдауды тапсырды, деп хабарлайды alataunews.kz.
Бұл туралы Президенттің кеңесшісі және баспасөз хатшысы Берік Уәли мәлімдеді.
«Мемлекет басшысы Премьер-Министрге, Президент Әкімшілігінің Басшысына, күштік құрылымдардың жетекшілеріне және барлық әкімдерге Украина төңірегіндегі жағдайдың шиеленісуіне байланысты негізгі нысандардың қауіпсіздігін қамтамасыз ету жөнінде тапсырма берді,» – деп жазды Уәли.
Сонымен қатар, Парламент палаталарының төрағалары қабылданған іс-қимылдар туралы хабардар етілді.
Берік Уәлидің айтуынша, Президент еліміздегі жағдайды жеке бақылауында ұстап отыр.
«Қазақстан үшін басты стратегиялық мақсат – тұрақтылық, тыныштық, заң мен тәртіптің үстемдігін сақтау. Бұған дейін Қазақстан қақтығысты келіссөздер арқылы тоқтатудың маңыздылығын бірнеше рет атап өткен,» – деп қосты баспасөз хатшысы.
