Мемлекет басшысы академия аумағын аралап, 180 балаға арналған жатақхананы көрді. Қазіргі уақытта мұнда Қазақстанның әр өңірінен келген 116 жас футболшы білім алып, жаттығып жүр.
Президентке академияға іріктеу жұмыстарын испандық мамандар жүргізгені айтылды. Іріктеуге еліміздің түкпір-түкпірінен 4 мыңнан астам бала қатысқан. Орталықта жас спортшылардың оқуына, кәсіби жаттығуына және жеке дамуына қажетті барлық жағдай жасалған.
Сапар барысында Қасым-Жомарт Тоқаевқа академияны одан әрі дамыту және спорттық инфрақұрылымды кеңейту жоспары таныстырылды. Жоба аясында жасанды жабындысы бар екі ашық футбол алаңын, 500 орындық жабық манежді және жаңа әкімшілік-тұрмыстық кешен ғимаратын салу көзделген.
Сондай-ақ Президентке академияның орналасатын орнын таңдауда табиғи-климаттық ерекшеліктер ескерілгені баяндалды. Алматы облысы Талғар ауданындағы таулы аймақтың таза ауасы мен қолайлы климаты балалардың денсаулығын нығайтып, жаттығудан кейін тез қалпына келуіне мүмкіндік береді.
Бұдан кейін Мемлекет басшысы FIFA талаптарына сай келетін футбол алаңын аралап көріп, испандық әдістеме бойынша жаттығып жатқан жас футболшылардың оқу-жаттығу процесін тамашалады. Жас спортшылар допты меңгеру техникасы мен командалық өзара іс-қимыл дағдыларын жетілдіру бағытында жаттығу өткізді.
Іс-шараға Испанияның Қазақстандағы елшісі Луис Франсиско Мартинес Монтес, «Атлетико Мадрид» футбол клубы директорлар кеңесінің мүшесі Давид Вилья, сондай-ақ клубтың академия істері және халықаралық даму жөніндегі директорының орынбасары Мария Тереса Кириви қатысты.
