Мемлекет басшысының айтуынша, бүгінде Алатау қаласының сапалы әрі тұрақты дамуына негіз болатын құқықтық база толықтай қалыптасқан.
«Жалпы, Алатау қаласына қатысты кез келген мәселені жедел шешу үшін барлық қажетті жағдай жасалып жатыр. Қазірдің өзінде қаланың сапалы дамуына жол ашатын құқықтық негіз толық қалыптасты деп айтуға болады», – деді Президент.
Қасым-Жомарт Тоқаевтың сөзінше, қалада инвестициялық тартымдылықты арттыру және кәсіпкерлікті дамыту үшін бірқатар жеңілдіктер қарастырылған.
«Соның аясында салық жеңілдіктері ұсынылды, бақылау және реттеу тетіктері де бизнес жүргізу үшін оңтайлы бола түсті», – деді Мемлекет басшысы.
Президент сондай-ақ Алатауда кәсіпкерлердің құқықтарын қорғауға және цифрлық экономиканы дамытуға ерекше көңіл бөлінетінін атап өтті.
«Бұдан бөлек, осы қалада жұмыс істейтін кәсіпкерлердің құқықтары жан-жақты қорғалады, сондай-ақ цифрлық активтерді дамыту үшін қолайлы жағдай жасалады», – деді ол.
Мемлекет басшысының пікірінше, қабылданған шаралар Алатаудың ерекше мәртебеге ие жаңа буын қаласына айналуына мүмкіндік береді.
«Сондықтан бүгінде Алатауды ресми түрде бірегей құқықтық мәртебесі бар «қарқынды дамитын қала» деп атауға болады», – деді Қасым-Жомарт Тоқаев.
