Мамыр айында Текеліде топырақтың ылғалдануы салдарынан сел жүріп, тау бөктеріндегі үйлерді басқан еді. Солардың бірінде тұрып жатқан Гүлнар Тілеухан баспанасы мен 5 жасар қызынан айырылып қалды.
Қайғылы жағдайдан кейін тұрғындар қаражат жинап, әкімдікпен бірлесіп құны 8,5 млн теңгелік екі бөлмелі пәтер алып берді. Бұдан бөлек 600 мың теңгеден аса ақшалай көмек көрсетті. Ал, жергілікті кәсіпкер 3 млн теңгеге үй жиһазы мен тұрмыстық техникалар сыйлады.
«Қуана алмаймын. Қызымның орнын толтыра алмайды. Кенжемнің орны бір бөлек. Сағынып жүрмін. Қайғыма ортақ болып, көмектесіп жатқан халқыма және облыс пен қала әкіміне рахмет», – деді Гүлнар Тілеухан.
Жанында тек 13 жасар қызы қалды. Ендігі арманы осы қызының аман-есен ер жеткені. Әкімдік те жан-жақты қолдау көрсетуге дайын – Гүлнардың есеп шотына ақша аудармақшы.
«Үлкен қызының оқуына керек жабдықтар алу үшін 2 млн теңге шотқа аударатын боламыз. Енді барлығы дұрыс болсын, жақсылық болсын, аман болайық», – деді қала әкімі Батыр Молдахметов.
Еске салсақ, бұған дейін Текелі қаласында 1,5 ай бұрын көшкін салдарынан бес жасар қызы қайтыс болған ана баспана жоқтығына шағымданғаны туралы хабарлаған болатынбыз.
