Кеңдала ауылының іргесінде, 100 метр жерде қоқыс полигоны орналасқан. Тұрғындардың айтуынша, іргедегі елдімекенде егеуқұйрықтардан аяқ алып жүру мүмкін емес. Сондықтан наразы топ қоқыс алаңын мүлде басқа аумаққа көшіруді талап етіп отыр. Ал полигон иесі кәсібін әкімдік өкілдері әдейі шу шығарып, тартып алмақ деп топшылайды.
Ауыл тұрғыны Жанна Кимнің айтуына қарағанда, инфекция, ауруларды ұшқан құс пен жүгірген жәндік таратады. Жерге сіңгені ауыз суға әсер етеді.
Жоспар бойынша бұл жерде қоқыс өңдейтін зауыт салынуы қажет. Бірақ құрылыс әлі басталмаған. Есесіне, кәсіпкер 1 гектардан астам жерге қоқыс төккен.
«Зерттеудің нәтижесі бойынша ауаның не экологиялық, не санитарлық талаптарға сай емес екені анықталды. Ауадағы мыс пен мырыш 8-8,5% артық. Әрі полигон қоршалмаған. Жер асты суларының ластану деңгейін бақылайтын арнайы құрылғылар да орнатылмаған», — дейді аудандық экология кеңесінің төрағасы Мирас Байсейітов.
Ал басы дауға қалған тарап өз шындығымен бөлісті.
«Электр энергия қуатын алуға рұқсат берудің орнына, көмек берудің орнына кәсіпкерге барлық уақытта жаңағы наразылықтар көрсетіліп отырған. Әлі күнге дейін. Станок жұмыс істемейді деп айтасыздар. Станок қалай жұмыс істейді? Электр энергия жоқ болса», — деп жауап берді кәсіпкердің заңгері Асылбек Қараев.
Әзірге кәсіпкер мен тұрғындар текетіресі қалай шешілері белгісіз. Әйтеуір, ызалы ел оңайлықпен ымыраға келмейміз деп отыр.
