Аталған жол апаты түн ортасында Тоқшын ауылының бұрылысына жақын жерде орын алды. Петропавл қаласының 69 жастағы тұрғыны астық тасымалдайтын тіркемесі бар МАЗ автокөлігін жүргізіп келе жатып, 7 бұзауды қағып кетті.
Бұзаулардың барлығы оқиға орнында мерт болды. Полицейлер мал иесі — Қызылжар ауданының 57 жастағы тұрғыны екенін анықтады. Оған қатысты ҚР ӘҚБтК-нің 408-бабы (Ауыл шаруашылығы жануарларын жаю қағидаларын бұзу) бойынша хаттама толтырылды.
«Жыл басынан бері полиция қызметкерлері қаңғыбас малды арнайы вагондарға 3008 рет жеткізді. Облыста осындай арнайы 230 орын бар. Бұдан бөлек, облыс жолдарында жануарлардың макеттері орнатылды. Мал иелерінен мұқият болуды сұраймыз», — дейді ПД бастығы Айдын Байматов.
Тәртіп сақшылары жүргізушілерге тәуліктің қараңғы кезінде, жаңбырда, әсіресе жүк тиелген көлікті басқарған кезде аса сақ болуды ескертеді.
