«Өзендердің бассейндеріндегі 7 көлді босату жұмыстары ауа райының қолайсыздығына және таулы аймақтың төмен температуралық жағдайына байланысты бір ай кеш басталды. Алматы маңында 45 мореналық және мұздық көп көл бар. Оның 12-сі аса қауіпті. Алматы қаласының аумағында селмен күресудің ең тиімді әдісі — мореналық көлдерді босату бойынша алдын алу жұмыстарын жүргізу», — деп хабарлады ведомстводан.
Жұмысты атқаруға 40 адам жұмылдырылып, бульдозерлер іске қосылды. Эвакуациялық каналдарды тазарту және тереңдету жұмыстарын жүргізу жоспарланған.
«Суды қосымша айдау үшін арнайы понтондарда 10 бірлік өнімділігі жоғары су сору қондырғылары қойылады. Сондай-ақ, су ағызу белгіленген сифонды құбырлар желілері бойынша жүзеге асырылады. №6 және 13 Бис көлдеріндегі екі сифон желісі автоматты түрде қосылды. Үлкен Алматы өзені бассейніндегі №8 және 13 Бис қауіпі бар көлдерде қосымша 2 желіні қосу жоспарлануда, ол үшін 2900 метр полиэтилен құбырлары дайындалды», — деп атап өтті қалалық ТЖД баспасөз қызметінен.
Мореналық көлдердің жай-күйіне бақылау жүргізу үшін тұрақты негізде жұмыс істейтін 9 бекет бар. Бұған қоса 10 биік таулы маусымдық бекеттер қойылған. Сел қаупі бар кезеңде барлығы 19 бекет жұмыс істейтін болады.
Сондай-ақ, Төтенше жағдайлар департаменті сел қаупін автоматтандырылған мониторинг арқылы бақылайды.
