Ол қаладағы №4 емханаға соғып, медициналық мекеменің бүгінгі жай-күйімен танысты. Емделушілермен тілдесіп, мәселелерін тыңдады. Сондай-ақ, емхана қызметкерлерімен де кездесу өткізіп, сайлауалды бағдарламасын таныстырды.
Жалпы бұл емхана 80 мың адамға шақталған. Қазір 70 мыңға жуық тұрғын ғана тіркелген. Дәрігерлер күніне 1 мың науқасты қабылдай алады.
«Әуежайдан бірден төртінші поликлиникаға келіп отырмыз. Неге десеңіздер, бұл жерде ең бірінші халыққа медициналық қызмет көрсету сапасын білгіміз келді. Халықтың қандай мұңы бар, қандай бізге айтар ескертулері бар», – деді өз сөзінде президенттікке кандидат Салтанат Тұрсынбекова.
Естеріңізге сала кетейік, сайлау алдындағы үгіт-насихат 2022 жылғы 21 қазанда басталды және сайлаудан бір күн бұрын, яғни 19 қарашада аяқталады. 19 қараша – республика бойынша тыныштық күні. Ал, 20 қарашада Президент сайлауы өтеді.
