Жауапты тараптардың мәліметінше, туристік маусымға әзірлік аясында жағажай аумағында бірқатар жұмыстар жүргізілуде. Атап айтқанда, тапшандар ретке келтіріліп, инфрақұрылым нысандары жөнделіп жатыр, сондай-ақ айналаны көгалдандыру жұмыстары қолға алынған.
Инвестордың айтуынша, шомылу маусымы аяқталған соң жағажай аумағында төрт қабатты қонақ үй салу жоспарланып отыр. Бұл жоба өңірдегі туристік әлеуетті арттыруға бағытталған.
Қала басшысы демалушылардың қауіпсіздігі басты назарда болуы тиіс екенін атап өтті. Осыған байланысты бейнебақылау камераларын орнату, құтқару бекеттерін орналастыру және жағажайды толық жабдықтау бойынша нақты тапсырмалар берілді. Сонымен қатар, санитарлық тораптар мен қоғамдық тамақтану орындарының тұрақты жұмыс істеуі қажеттігі айтылды.
Айта кетейік, №4 жағажай басқа коммуналдық жағажайлар сияқты жаяу келушілер үшін тегін болады.
Сапар барысында әкім қаладағы 8–10 шағынаудандар аумағында жобаларын ұсынған инвесторлармен де кездесу өткізді.
