Рейдтік іс-шараларды Қонаев қаласының прокуратурасы Төтенше жағдайлар департаменті мен Қонаев қалалық полиция басқармасының қызметкерлерімен бірлесіп, Қапшағай су қоймасының жағалауындағы халық көп шоғырланатын демалыс орындарында жүргізді.
Акцияның негізгі мақсаты – туристік маусым кезінде қоғамдық тәртіпті сақтау, азаматтардың қауіпсіздігін қамтамасыз ету, құқық бұзушылықтардың алдын алу және судағы жазатайым оқиғалардың санын азайту.
Рейд барысында заң талаптарын өрескел бұзу фактілері анықталды. Атап айтқанда, гидроциклді басқару құқығы жоқ кәмелетке толмаған жасөспірімнің су көлігін тізгіндегені белгілі болды. Сонымен қатар алкогольдік масаң күйде катер басқарған ер адам анықталды.
Анықталған құқық бұзушылықтар бойынша уәкілетті органдар әкімшілік хаттамалар толтырып, заңнамаға сәйкес тиісті шаралар қабылдады.
Өкінішке қарай, рейд жүргізіліп жатқан уақытта қайғылы оқиға тіркелді. Қапшағай су қоймасында 8 жастағы қыз бала суға батып көз жұмды.
Бұл қайғылы жағдай судағы қауіпсіздік талаптарын қатаң сақтаудың маңызын тағы бір мәрте көрсетті. Құзырлы органдар ата-аналар мен демалушыларды балаларды қараусыз қалдырмауға, сондай-ақ су айдындарында белгіленген қауіпсіздік ережелерін бұлжытпай орындауға шақырады.
