Алматы облысына әлемдік F1H2O ұйымының, iHolding компаниясының және Сауд Арабиясынан келген ресми делегация өкілдері арнайы келіп, өңір әкімі Марат Сұлтанғазиевпен кездесті. Келісімге сәйкес, халықаралық жарысты алдағы бес жыл бойы Қапшағай су қоймасында өткізу жоспарланып отыр.
Осылайша Қазақстан Formula 1 H2O әлем чемпионатын қабылдайтын алтыншы мемлекет атанбақ.
Ұйымдастырушылардың мәліметінше, жарысқа шетелден кемінде 5 мың қонақ келеді деп күтілуде. Жергілікті тұрғындар мен туристерді қоса есептегенде көрермен саны бұдан да көп болады. Ал телетрансляция арқылы чемпионатты әлем бойынша 1 миллиардқа жуық адам тамашалайды деген болжам бар.
Алматы облысының әкімі Марат Сұлтанғазиев мұндай халықаралық жарыстар өңірдің туристік әлеуетін арттыруға ықпал ететінін атап өтті.
«Жыл сайын Қапшағай су қоймасында Tengri Ultra марафоны мен Oceanman ашық суда жүзу жарысы, сондай-ақ республикалық деңгейдегі түрлі спорттық іс-шаралар өтеді. Осындай халықаралық жобалар туризмді дамытып, өңір экономикасының өсуіне серпін береді. Сондықтан біз бұл жобаны бірлесіп жүзеге асыруға дайынбыз», – деді өңір басшысы.
KSA ProMediaPortal және F1H2O ұйымдарының басқарма төрағасы Яссер Әли Әл-Ямидің айтуынша, қазіргі таңда әлем чемпионатына 11 мемлекет қатысады. Оның сөзінше, жарыс кезінде халықаралық стандарттарға сай қауіпсіздік талаптары толық сақталады.
Жоба аясында VIP-аймақтар, жарысты басқару орталығы, командалардың техникалық базасы, медиаорталық және отбасылық демалыс аймақтары ұйымдастырылады. Сондай-ақ қонақтарға Қазақстанның мәдениеті таныстырылып, ұлттық тағамдар мен кәдесыйлар ұсынылады. Чемпионат аясында ойын-сауық бағдарламалары өтіп, жабылу салтанатында әлемге танымал өнер жұлдыздарының қатысуымен гала-концерт ұйымдастыру жоспарланған.
«Қазақстан мен Сауд Арабиясы арасындағы ынтымақтастық нығайып келеді. Біз Алматы облысының даму әлеуетін жоғары бағалаймыз және алдағы уақытта бұл өңір халықаралық бизнес пен туризмнің маңызды орталықтарының біріне айналады деп сенеміз», – деді Яссер Әли Әл-Ями.
Әкімдіктің мәліметінше, Formula 1 H2O әлем чемпионатын өткізу өңірге туристер ағынын көбейтіп, инвестиция тартуға, инфрақұрылымды дамытуға және Алматы облысының халықаралық деңгейдегі танымалдылығын арттыруға мүмкіндік береді.
