Қала басшысы мердігер компания өкілдерімен және ШЖҚ «Жылу Орталығы» МКК басшысы Ержан Шоқанмен кездесіп, құрылыс жұмыстарын белгіленген мерзімде әрі сапалы аяқтауды тапсырды.
«Құрылыс сапасы мен кестеден ауытқымау тұрақты бақылауда болсын. Жылыту маусымы еш кедергісіз өтуі тиіс», – деді Асхат Бердіханов.
Қазіргі уақытта Қонаевта «Энергетикалық және коммуналдық секторды модернизациялау» ұлттық жобасы аясында 2 шақырымнан астам жылу желісі ауыстырылып жатыр. Жобаның негізгі мақсаты – коммуналдық инфрақұрылымды жаңартып, тұрғындарды жылумен тұрақты қамтамасыз ету.
Қаладағы инженерлік желілерді жаңғырту жұмыстары мұнымен шектелмейді. Алдағы уақытта осы ұлттық жоба шеңберінде 8,5 шақырымнан астам ауыз су және кәріз желілерін ауыстыру жұмыстары басталады.
Осылайша Қонаевта бір мезгілде жылу, ауыз су және кәріз инфрақұрылымын кезең-кезеңімен жаңарту көзделіп отыр. Ал жылу желілеріндегі қазіргі жұмыстарды жылыту маусымы басталғанға дейін аяқтау міндеті қойылды.
