Жарысқа шаһардың 20 шақты мектеп оқушылары қатысты. Орталық саябақта асық ату үшін арнайы шеңбер сызылған. Бұл алдағы уақытта қала тұрғындарының қалаған кезінде келіп, ойнайтын жері болмақ. Балалар ойын ережесімен танысқан соң, бірден ойнай бастады. Сайыста қалыпты қазақи ойын ережесінен ерекшеленген қағидалар болмады.
Бір сағатта өз межесіне жеткен ойында 3-ші орынды Абдурахман Есбол, 2-ші орынды Асылбек Исабек иеленді. Ал Мәметай Бақдәулет балалар арасынан топ жарып, 1-ші орынды жеңіп алды. Оларға арнайы сыйлықтар табыс етілді. Ойында бағы мен бабы қатар шаппаған жеткіншектерге ынталандыру сыйлығы табысталды.
Айта кетейік, бұл шара Алматы облысының «Рухани жаңғыру» орталығының ұйымдастыруымен өтті. Аталған мекеменің басшысы Ерасыл Толымбекұлы қалаға «Алтыбақан» орнату жоспарланып отырғанын айтты.
