Мұнда әлем рейтингінде әр салмақтың үздік 30 спортшы ғана бақ сынады. Барлығы 61 елден 434 татами шебері жиналды. Бұл қатарда Қазақстан құрамасының 19 каратэшісі бар. Екі күнге созылған турнирде Ұлттық құрама спортшылары Каирде 4 жүлдеге қол жеткізді.
Кумите бағдарламасында 60 кг дейінгі салмақта сынға түскен Қайсар Алпысбай финалда жарыс қожайыны, мысырлық Мұхамед Габерді 3-1 есебімен ұтып, чемпион атанды. Осыған дейін Премьер-лиганың 2 дүркін жеңімпазы атанған Қайсар кеше жартылай финалда әзірбайжандық Аминага Гулиевті 6-2 есебімен жеңген.
Ал әйелдер арасындағы кумитенің +68 кг салмағында бас жүлдені Токио Олимпиадасының 2 қатысушысы отандасымыз Софья Берульцева мен жапон Аюми Уэкуса сарапқа салды. Тартысты өткен жекпе-жекетің соңында Аюми жеңісті жұлып әкетті. Есеп: 7-1.
Айта кетейік, кеше Софья жартылай финалда әлем чемпионы испандық Мария Торресті 6-1 есебімен тізе бүктірген еді.
Сондай-ақ бұл додада Дидар Әмірәлі (-67 кг) мен Бейбарыс Жаңбыр (-75 кг) қола жүлдеге ие болды.
