Министрдің айтуынша, биыл ҰБТ 10 мамырда басталған. 2026 жылы Қазақстан бойынша шамамен 215 мың оқушы мектеп бітіреді. Бұл көрсеткіш жыл сайын артып келеді.
«2023 жылы мектеп бітірушілер саны 162 мың болса, 2024 жылы – 188 мың болды. Бұл жоғары білімге деген сұраныстың тұрақты өсіп келе жатқанын көрсетеді», – деді Саясат Нұрбек.
Оның мәліметінше, биыл ҰБТ-ға 239 мыңнан астам адам тіркелген. Оның ішінде өткен жылдардың түлектері мен колледж бітірушілері де бар. Ал 200 мыңға жуығы – биылғы мектеп түлектері.
Министрлік тарапынан ҰБТ өткізуге қатысатын барлық мемлекеттік органдардың жұмысы үйлестірілгені айтылды.
«Барлық өңірде жергілікті атқарушы органдар, құқық қорғау құрылымдары, жоғары оқу орындары мен білім басқармаларының қатысуымен мемлекеттік комиссиялар құрылды», – деді министр.
Ұлттық бірыңғай тестілеу 10 мамыр мен 10 шілде аралығында өтеді. Биыл тестілеу форматы өзгеріссіз қалған. Талапкерлер ҰБТ-ны екі рет тапсырып, грант конкурсына ең үздік нәтижесімен қатыса алады.
Сондай-ақ тестілеу аяқталғаннан кейін қатысушылар дұрыс және қате жауаптар туралы ақпаратпен қатар, нәтижелердің толық талдауын алады.
Қазіргі таңда 80 мыңнан астам адам ҰБТ тапсырып үлгерген.
