2025 жылдың тамыз айында жаңа тұрғын үйлердің бағасы былтырғы жылдың тиісті кезеңімен салыстырғанда 11,3 пайызға, ал қолданыстағы пәтерлерді қайта сату құны 8,8 пайызға жоғарылады. Сондай-ақ, абаттандырылған тұрғын үйді жалға алу төлемі 8,5 пайызға артқан.
Өңірлер бөлінісінде жаңа пәтерлердің бағасы ең көп Павлодар қаласында 25,8 пайызға, Қызылорда мен Алматы қалаларында 15,3 пайызға, Шымкент қаласында 14,8 пайызға қымбаттаған.
Қолданыстағы тұрғын үйлер нарығында бағаның ең жоғары өсімі Ақтөбе қаласында (20,2%), Павлодарда (17,8%) және Алматыда (16,6%) тіркелді. Ал жалға алу құны Ақтөбеде 43,5 пайызға, Көкшетауда 21 пайызға, Жезқазғанда 20,2 пайызға артқан.
Ағымдағы жылдың тамыз айын шілде айымен салыстырғанда да өсім байқалады. Жаңа тұрғын үйлердің құны 1,9 пайызға, қолданыстағы пәтерлерді қайта сату 1,2 пайызға, жалға алу төлемі 1,7 пайызға өскен.
Тұрғын үйге деген сұраныстың да жоғары екені анық. Биылғы тамызда елімізде жылжымайтын мүлікті сатып алу-сату бойынша 41 380 мәміле тіркелген. Оның ішінде 8 527-сі жеке үйлерге, 32 853-і көпқабатты үйлердегі пәтерлерге тиесілі.
Бұл көрсеткіш шілде айымен салыстырғанда (39 742 мәміле) 4,1 пайызға артық. Мәмілелер саны бойынша көш басында – Астана қаласы (9 457 мәміле немесе 22,9%), Алматы қаласы (8 402 немесе 20,3%) және Қарағанды облысы (2 923 немесе 7,1%). Ал ең төменгі көрсеткіш Ұлытау облысында тіркелген – небәрі 283 мәміле (0,7%).
