Жаңа жылдан бастап жеке медициналық кітапшаларды беру, есепке алу және жүргізу толығымен электронды форматқа көшіріледі. Бұл жаңашылдық азаматтарға құжаттарды бірнеше ұйымға бірден ұсынуға мүмкіндік беріп, олардың уақытын және қаражатын үнемдейді. Қазіргі таңда 1,6 миллионға жуық қазақстандықтың санитарлық кітапшасы бар.
Қағаз түріндегі құжаттар электронды форматқа ауыстырылып, азаматтарға ыңғайлы болу үшін келесі құжаттарды электронды түрде беру жоспарланып отыр:
- Еңбекке жарамсыздық парағы
- 075/у «Медициналық анықтама»
- 026/у «ДКК қорытындысы»
- 073/у «ТҚ басқаруға рұқсат беру туралы анықтама»
- 069/у «Санаторий-курорттық карта»
- 052-2/у «Бала денсаулығы паспорты»
- 076/у «Қаруға рұқсат алу»
- 038/у «Еңбекке уақытша жарамсыздық туралы анықтама»
Бұл мақсатта ақпараттық жүйелерді интеграциялау жұмыстары жүргізіліп жатыр. Барлық құжаттар азаматтардың келісімімен ғана «eGov mobile» қосымшасындағы «еDensaulyq» бөлімінде қолжетімді болады.
Жаңа жылдан бастап балаға екпе салуға рұқсат беру немесе одан бас тарту электронды түрде тіркелетін болады. Егер пациент вакцинадан кейін асқынуларға шағымданса, әрекет алгоритмі өзгереді. Мұндай жағдайда дәрігер тез арада көмек көрсетіп, электронды хабарлама рәсімдеп, оны тиісті мемлекеттік органдарға тапсыруға міндетті.
Мұндай өзгерістер медициналық құжаттарды рәсімдеу процесін жеңілдетіп, азаматтарға үлкен ыңғайлылық сыйлайды.
