Ішкі істер министрінің орынбасары Игорь Лепеха Қазақстанда көлікті мас күйінде басқарған адамдарға 7 жыл бойы жүргізуші куәлігі берілмейтінін мәлімдеді, деп хабарлайды alataunews.kz.
Бұл заң жобасы Сенат тарапынан мақұлданған. Лепеха жаңа заңның нормаларын түсіндіре отырып, мас күйде көлік басқарған азаматтарға қатысты әділеттілік орнату мақсатында өзгерістер енгізілгенін айтты.
«Мысалы, жүргізуші куәлігі жоқ адам мас күйінде әкесінің көлігімен ұсталды делік. Оны соттың үкімімен 20 тәулікке қамауға алады, бірақ ол жүргізуші куәлігінен айырылмайды, себебі ол оны әлі алған жоқ. Ертең ол ХҚКО-ға барып, жүргізуші куәлігін ала алады және 3 айдан соң көлік жүргізе алады. Бұл әділетті емес. Сондықтан жаңа заң бойынша ол 7 жыл бойы жүргізуші куәлігін алу құқығынан айырылады,» – деді Игорь Лепеха.
