Оның айтуынша, су арналары кәсіпорындарының қызметін кезең-кезеңімен автоматтандыру көзделген. Бұл өз кезегінде апаттар санын азайтуға, электр энергиясына кететін шығындарды қысқартуға және жабдықтардың қызмет ету мерзімін ұзартуға мүмкіндік береді. Аталған іс-шараларды жүзеге асыру үшін Дүниежүзілік банктің қаржысын тарту жоспарланып отыр.
Вице-министрдің мәліметінше, отандық және халықаралық сарапшылардың қатысуымен Астана, Шымкент, Орал, Екібастұз және Шахтинск қалаларындағы су арналарының қызметі жан-жақты бағаланған. Нәтижесінде процестерді оңтайландыру бойынша нақты ұсыныстар әзірленіп, біртұтас цифрлық шешімдерді кезең-кезеңімен енгізуді көздейтін техникалық-экономикалық негіздеме дайындау үшін техникалық тапсырма жасалған.
«Сумен жабдықтау аспаптарын орнату бойынша өтінімдерді қалыптастыру мақсатында әкімдіктермен және табиғи монополия субъектілерімен бірлескен жұмыс жүргізіліп жатыр. 2026–2028 жылдары 3,6 миллионнан астам “ақылды” су есептеу құрылғыларын орнату жоспарлануда», – деді Қуандық Қажкенов.
Сонымен қатар, су саласына халықаралық тәжірибені енгізу мақсатында былтыр жетекші еуропалық және азиялық басқарушы компаниялармен келіссөздер жүргізілген.
«Нәтижесінде әлемнің көптеген елдерінде, соның ішінде АҚШ, Франция, Италия, Испания, БАӘ, Жапония, Сингапур, Катар және өзге де мемлекеттерде тәжірибесі бар ірі халықаралық желілік операторлар – Veolia, Suez және Aqualia компанияларымен ынтымақтастық туралы меморандумдарға қол қойылды», – деді вице-министр.
Оның сөзінше, бұл формат активтерді жеке компанияларға беру емес, мемлекеттің бақылауын сақтай отырып, басқарушылық құзыреттер мен халықаралық үздік тәжірибелерді тартуға бағытталған. Қазіргі уақытта бірқатар азиялық компаниялармен, соның ішінде Manila Water Company және China Civil Engineering Construction ұйымдарымен келіссөздер жалғасып жатыр.
Мамандардың айтуынша, «ақылды» су есептегіштерді енгізу су ресурстарын тиімді пайдалануға, шығындарды азайтуға және коммуналдық қызметтердің ашықтығын арттыруға мүмкіндік береді.
