Құжат қылмыстық саясатты ізгілендіруге бағытталған және Мемлекет басшысы Қасым-Жомарт Тоқаевтың тапсырмасы бойынша әзірленген.
Заңға сәйкес, жаңа Конституцияның қабылдануына орай жарияланған рақымшылық 15 мыңнан астам азаматты қамтиды. Атап айтқанда, қылмыстық теріс қылықтар мен онша ауыр емес қылмыстар жасаған адамдар қылмыстық жауапкершіліктен және негізгі жазадан босатылады.
Сонымен қатар, Қазақстан тарихында алғаш рет әкімшілік рақымшылық енгізілмек. Бұл норма бойынша азаматтармен қатар жеке кәсіпкерлер, нотариустар, адвокаттар, жеке сот орындаушылары және заң консультанттары орындалмаған әкімшілік айыппұлдарды төлеуден босатылады.
Алайда рақымшылық барлық санаттағы құқық бұзушыларға қолданылмайды. Заңның күші терроризм және экстремизм қылмыстары, сыбайлас жемқорлық құқық бұзушылықтары, ұйымдасқан қылмыстық топтарға қатысу, азаптау, кәмелетке толмағандардың жыныстық қол сұғылмаушылығына қарсы қылмыстар үшін сотталғандарға, сондай-ақ қайталама қылмыс жасағандарға, өмір бойына бас бостандығынан айырылғандарға және сырттай сотталғандарға таралмайды.
Алдын ала есептеулер бойынша, рақымшылық шамамен 15,3 мың адамды қамтиды. Оның ішінде 4,5 мыңға жуық адам жазадан толық босатылады. Тағы 10,8 мыңнан астам сотталғанның жаза мерзімі немесе жаза көлемі қысқартылады.
Бұған дейін Президент Қасым-Жомарт Тоқаев рақымшылық қоғам мен мемлекеттің қауіпсіздігіне қатер төндірмейтін құқық бұзушылықтарға ғана қатысты қолданылатынын атап өткен болатын.
