Министрдің айтуынша, Қазақстан автокөлік құрастырудың күрделі деңгейіне өтіп келеді. Автокөлік өндірушілерінің алдына шағын торапты құрастыру (CKD) үлесін 2027 жылға қарай жалпы өндірістің 50% — на дейін ұлғайту бойынша міндеттемелер қойылды.
Биылдың өзінде бұл көрсеткіш 20%-ға, 2025 жылы 30%-ға, ал 2026 жылы 40%-ға жетуі керек.
Қанат Шарлапаевтің мәліметінше, елде қытай автомобильдерін шығаратын мультибрендтік зауыт салу жобасы іске қосылды. Зауыттың өндірістік қуаты 90 мың бірлікті құрайды, жобаның құны — 182 миллиард теңге.
2027 жылға қарай шағын торапты құрастыру әдісімен 200 мыңға жуық автомобиль шығаруды жоспарлап отыр.
«СарыарқаАвтоПром» ЖШС шығаратын автомобильдер желісі биылғы жылы қытайлық Jetour маркасымен толықтырылады. Сондай-ақ, билік чехиялық Skoda компаниясымен келіссөздер жүргізуде.
Сонымен қатар, Astana Motors компаниялар тобы 2025 жылға дейін іске қосуды жоспарлап отырған өндірістік желіні ұйымдастыру үшін Changan, Chery, Haval сияқты танымал қытайлық брендтерді тартты, – деп атап өтті Шарлапаев.
