Мәліметке сәйкес, 2025 жылы Қазақстан Қытайдан 211 мың 545 автокөлік импорттаған. Осы көрсеткішпен ел қытай көліктерін ең көп сатып алатын мемлекеттердің рейтингінде оныншы орынға жайғасқан.
CPCA дерегінше, 2025 жылы Қытай шетелге жалпы саны 8,32 миллион автокөлік экспорттаған. Бұл бір жыл бұрынғы көрсеткіштен 30 пайызға көп.
Экспортталған көліктердің ішінде электрлі және гибридті автокөліктердің үлесі айтарлықтай артқан. Былтыр NEV санатындағы көліктер саны 3,43 миллионға жеткен.
Сарапшылардың айтуынша, 2025 жылы жаңа энергетикалық көліктердің сатылымы 16 пайыздан 70 пайызға дейін күрт көтерілген.
Қытай көліктерін көп импорттайтын мемлекеттердің көшін Мексика, Ресей және Біріккен Араб Әмірліктері бастап тұр. Қазақстан алғашқы ондықты түйіндеп отыр.
2025 жылғы рейтинг:
Мексика – 625 187
Ресей – 582 738
БАӘ – 571 937
Ұлыбритания – 335 551
Бразилия – 322 076
Сауд Арабиясы – 302 189
Бельгия – 300 103
Австралия – 297 382
Филиппин – 256 681
Қазақстан – 211 545
Мәліметте Қытайдың автокөлік экспорты 2025 жылдың қаңтарында күрт өскені атап өтіледі. Алайда ақпаннан сәуірге дейін АҚШ енгізген тарифтердің әсерінен сатылым төмендеген.
Кейін мамырдан қарашаға дейін экспорт қайта қалпына келіп, желтоқсанда пайдаланылған автокөліктердің экспорты күрт артқан.
Экспортталған көліктердің орташа бағасы 16 мың АҚШ доллары болған.
