Инновациялық құрылғы Қарағанды облысында Металлургтер күніне арналған мерекелік шаралар барысында сынақтан өтті.
Қарағанды облысы полиция департаментінің мәліметінше, 17–18 шілде күндері Балқаш және Теміртау қалаларында өткен мерекелік іс-шараларға 115 мыңнан астам адам қатысқан. Қоғамдық қауіпсіздікті қамтамасыз ету үшін мыңнан астам полиция қызметкері жұмылдырылып, жеке құрам күшейтілген жұмыс режимінде қызмет атқарған.
Жасанды интеллект құқық бұзушыларды анықтады
Мерекелік іс-шаралардың басты технологиялық жаңалығы – полицияның ақпараттық жүйелерімен біріктірілген, жасанды интеллект негізінде жұмыс істейтін қызметтік робот-ит болды.
Ведомство құрылғы нақты уақыт режимінде полицияның бақылауындағы азаматтарды автоматты түрде анықтаған. Бұл құқық қорғау органдарының әрекет ету жылдамдығын арттырып, құқық бұзушылықтың алдын алу тиімділігін күшейтеді.
«Басты технологиялық жаңалық – жасанды интеллект жүйесімен жабдықталған және полицияның ақпараттық базаларымен біріктірілген қызметтік робот-ит болды. Ол нақты уақыт режимінде полицияның назарына іліккен тұлғаларды тани алады, бұл әрекет ету жеделдігін және құқық бұзушылықтың алдын алу тиімділігін айтарлықтай арттырады», – делінген полиция департаментінің хабарламасында.
Робот-иттің көмегімен құқық қорғау органдарының іздеуінде немесе бақылауында болған төрт азамат анықталған. Олардың қатарында алимент төлеуден жалтарып жүрген бір адам, екі борышкер және сот белгілеген шектеуді бұзып, тұрғылықты мекенжайынан тыс жерде жүрген бұрын сотталған азамат бар.
Анықталған азаматтарға қатысты қолданыстағы заңнамаға сәйкес тиісті шаралар қабылданды.
87 жоғалған бала ата-анасына табысталды
Мерекелік іс-шара кезінде полиция қызметкерлері балалардың қауіпсіздігіне де ерекше назар аударды. Мыңдаған адамның арасынан адасып кеткен 3 пен 17 жас аралығындағы 87 бала дер кезінде табылып, ата-аналарына аман-есен тапсырылды.
Полицияны цифрландырудағы жаңа кезең
Қарағанды облысы полиция департаментінің өкілдері роботтандырылған технологияларды енгізу құқық қорғау органдарын цифрландыру бағытындағы маңызды қадамдардың бірі екенін атап өтті.
«Заманауи шешімдер қоғамдық тәртіпті сақтау тиімділігін арттырып қана қоймай, азаматтардың қауіпсіздігін сапалы жаңа деңгейде қамтамасыз етуге мүмкіндік береді», – деп мәлімдеді ведомствоның баспасөз қызметі.
Сондай-ақ полиция департаменті Балқаш пен Теміртау қалаларының тұрғындары мен қонақтарына қоғамдық тәртіпті сақтап, мерекелік іс-шаралардың қауіпсіз өтуіне үлес қосқандары үшін алғыс білдірді.
