Құқық қорғау органдарының мәліметінше, ұзақ уақыт жүргізілген жедел-іздестіру шаралары мен халықаралық ынтымақтастық нәтижесінде трансұлттық деңгейде жұмыс істеген қылмыстық топ әшкереленген.
Қылмыстық іс аясында күдіктілердің тұрғылықты мекенжайларында бір мезгілде бірнеше елде арнайы операция жүргізілді. Тінту жұмыстары Чехияның Усти-над-Лабем қаласында, сондай-ақ Астана, Алматы және Қарағанды қалаларында өтті.
Тергеу барысында құқық қорғау органдары заңсыз қызметке қатысты дәлелдер сақталған көптеген цифрлық құрылғыларды және қомақты көлемдегі қолма-қол ақшаны тәркіледі.
ІІМ Киберқылмысқа қарсы іс-қимыл департаментінің бастығы Жандос Сүйінбай күдіктілердің арнайы жабық интернет-ресурс құрғанын мәлімдеді. Оның айтуынша, бұл платформада Қазақстан және көршілес мемлекеттер азаматтарының жеке деректері заңсыз жарияланып отырған.
Тергеу мәліметтері бойынша, қылмыстық топ мүшелерінің арасында міндеттер нақты бөлінген. Бір бөлігі заңсыз схеманың жұмысын үйлестірсе, енді біреулері азаматтардың жеке мәліметтерін іздеу және ұсыну бойынша тапсырыстарды қабылдап, өңдеумен айналысқан. Ал заңсыз жолмен алынған табысты қолма-қол ақшаға айналдыру үшін арнайы дроп-аккаунттар пайдаланылған.
Сондай-ақ тергеу барысында ресурс арқылы жеке деректерге қол жеткізу үшін арнайы тарифтер белгіленгені анықталды. Қызмет пайдаланушыларға бір реттік сұраныс жолдау немесе ақылы жазылым рәсімдеу арқылы ұсынылған.
Қылмыстық схеманы ұйымдастырды деген күдікке ілінгендер ұсталып, уақытша ұстау изоляторына қамалды.
Қазіргі уақытта аталған факті бойынша сотқа дейінгі тергеу амалдары жалғасып жатыр. Құқық қорғау органдары қылмыстық схемаға қатысы болуы мүмкін өзге тұлғаларды анықтау жұмыстарын жүргізуде.
