Жол көлік оқиғасы Нұра кентінен 4 шақырым жердегі Жараспай-Нұра тас жолында тіркелді. Екі көліктің де жүргізушілері оқиға орнында қаза тапты, деп хабарлайды өңірлік полиция департаменті.
Оқиға орнынан түсірілген фотолар мен видеолар әлеуметтік желілерде жарияланды. Автор апат салдарынан жеті бала мен олардың ата-аналары зардап шеккенін айтқан. Кейбірі жансақтау бөлімінде жатыр. Алдын ала мәліметтер бойынша, жол апатына 58 жастағы Honda Odyssey жүргізушісі себеп болған. Ол Жараспай–Нұратас жолымен келе жатып, рөлді басқара алмай, қарсы бетке шығып, Volkswagen Golf-пен соқтығысқан.
Ал неміс машинасының жүргізушісі 25 жастағы жігіт.
«Жол апатынан Honda Odyssey жүргізушісі оқиға орнында көз жұмса, Volkswagen жүргізушісі медициналық мекемеде қайтыс болды. Golf жолаушылары: 33 және 37 жастағы ерлі-зайыптылар, сондай-ақ олардың 11, 8, 7, 6, 5, 3, 2 жастағы балалары және әйелдің 19 жастағы інісі ауруханаға жеткізілді», — деп хабарлады Қарағанды облыстық полиция департаментінің баспасөз қызметі.
Полицейлер бұл фактіні тіркеп, тиісті сараптамаларды тағайындады. Оның нәтижесі бойынша процессуалдық шешім қабылданатын болады.
Сондай-ақ, дәл осы күні Шығыс Қазақстан облысында жол көлік оқиғасы болып, бес адам қайтыс болған.
