Қазіргі уақытта құрылыс жұмыстарының негізгі бөлігі аяқталған. Бұған дейін жүруге қолайсыз болған ойлы-қырлы тау жолы толық тегістеліп, жол төсемін дайындау жұмыстары тәмамдалған. Қазір құрылысшылар асфальт төсеу жұмыстарын қарқынды жүргізіп жатыр. Бүгінгі күнге дейін жол бойына жоспарланған 42 су өткізгіш құбырдың барлығы толық орнатылып, 2,5 шақырым бөлігіне асфальт төселген.
Жобаның жалпы ұзындығы – 10 шақырым. Құрылыс жұмыстары 2025 жылдың қазан айында басталған. Жобаның жалпы құны 2,43 млрд теңгені құрайды. Ал биыл оны жүзеге асыру үшін жергілікті бюджеттен 1 млрд 374,9 млн теңге бөлінген.
Бұл жоба өңірдің көлік инфрақұрылымын жаңғыртып қана қоймай, туристік әлеуетін арттыруға да серпін береді. Жаңа жол іске қосылғаннан кейін Қайыңды көліне қатынау әлдеқайда ыңғайлы әрі қауіпсіз болады. Нәтижесінде табиғаттың бірегей жауһарын тамашалауға келетін отандық және шетелдік туристердің саны артып, өңірдегі туризмнің дамуына жаңа мүмкіндік ашылады.
Жолдың пайдалануға берілуі саяхатшылардың жол жүру уақытын қысқартып, көлік қозғалысының қауіпсіздігін қамтамасыз етуге және өңірдің туристік инфрақұрылымының сапасын жақсартуға ықпал етпек.
