Бұған дейін, 5 қыркүйекке Қасым-Жомарт Тоқаев Қостанай облысына Ахмет Байтұрсынұлының 150 жылдығына арналған іс-шараларға қатысуы жоспарланған еді. Төтенше жағдайға байланысты мерейтой кейінге қалдырылды.
Алдағы жұмыс сапары барысында Президент жедел штабқа барып, табиғи өрттерді жою бойынша қабылданып жатқан шаралармен танысуды жоспарлап отыр.
Жалпы өңірдегі жағдай бақылауға алынды. Төтенше жағдайлар министрі Юрий Ильин бастаған жедел штаб апатты жоюға жұмылдырылған барлық органдардың іс-қимылын үйлестіріп жатыр.
Президент Қасым-Жомарт Тоқаев кеше кешкісін Премьер-Министр Әлихан Смайыловтың, ТЖМ министрі Юрий Ильиннің және Қостанай облысының әкімі Архимед Мұхамбетовтың өрт ауданындағы жағдай туралы баяндамаларын тыңдады.
Барлық жұмылдырылған мемлекеттік органдардың жұмысын үйлестіруді Президент Әкімшілігінің басшысы Мұрат Нұртілеу және Президенттің көмекшісі — Қауіпсіздік Кеңесінің хатшысы Ғизат Нұрдәулетов жүзеге асырады. Олар Мемлекет басшысына өрттерді оқшаулау, азаматтарды елдімекендерден қауіпсіз жерге көшіру бойынша қабылданып жатқан шаралар туралы жедел баяндап отырады.
Президент азаматтардың қауіпсіздігін қамтамасыз етуге және өрт сөндіру шараларына басым назар аударуды тапсырды.
Үкіметке төтенше жағдайдың салдарын жою үшін қажетті қаражат бөлу тапсырылды.
