Мемлекет басшысы Қасым-Жомарт Тоқаев сот жүйесін жетілдірудің маңызды міндеттеріне тоқталып, сот шешімдеріне кассациялық тәртіппен шағымдану мүмкіндігін арттыру қажеттілігін атап өтті, деп хабарлайды alataunews.kz.
Президенттің айтуынша, шілде айында қылмыстық, азаматтық және әкімшілік істер бойынша жеке кассациялық соттар құруды көздейтін заңға қол қойылды. Кассациялық соттар өз жұмысын 2025 жылдың 1 шілдесінен бастап бастайды және олардың құрамы тәжірибелі судьялардан жасақталуы тиіс. Бұл сот төрелігіне қол жеткізуді жақсартып, инвестиция тарту мен бизнес жүргізуге қолайлы жағдай жасайды. Сонымен қатар, бұл қадам Жоғарғы Соттың жүктемесін азайтып, сот тәжірибесінің біркелкілігін қамтамасыз етуге мүмкіндік береді.
Тоқаев сот жүйесін цифрландырудың маңыздылығын да атап өтті. Цифрлық технологиялар сот процестерінің ашықтығын арттырып, сот ісін жеңілдетуге ықпал етуде. Сонымен қатар, жасанды интеллектіні кеңінен пайдалану сот дауларын азайтуға септігін тигізетіні айтылды.
