Өңірге Президент Іс басқармасы Медициналық орталығының Ұлттық госпиталі мен ауруханасының білікті мамандары келеді. Екі күн бойы тұрғындар сұранысқа ие медициналық бағыттар бойынша кеңес ала алады.
Атап айтқанда, уролог, гинеколог, нейрохирург, травматолог, хирург, онколог, эндокринолог, пульмонолог, невропатолог және ревматолог дәрігерлердің қабылдауына жазылуға мүмкіндік бар.
Консультациялық қабылдаумен қатар, елордалық мамандар өңір дәрігерлерімен бірлесіп күрделі хирургиялық оталар жасап, заманауи диагностика мен емдеу тәсілдерін енгізуге бағытталған шеберлік сабақтарын өткізеді.
Бағдарлама аясында медицина қызметкерлерінің біліктілігін арттыруға да ерекше назар аударылады. Ғылыми-практикалық конференциялар мен білім беру сессияларында сепсисті емдеудің заманауи әдістері, антибиотиктерді тиімді қолдану, ядролық медицинаның мүмкіндіктері, ісіктердің молекулалық диагностикасы, кардиологиядағы жаңа тәсілдер және денсаулық сақтау саласындағы цифрлық технологияларды енгізу мәселелері талқыланады.
Ұйымдастырушылардың айтуынша, мұндай іс-шаралар өңір тұрғындарына жоғары білікті мамандардың көмегін қолжетімді етіп қана қоймай, жергілікті дәрігерлердің тәжірибе алмасуына және медициналық көмектің сапасын арттыруға мүмкіндік береді.
