Мемлекет басшысы алдымен таза әрі пайдалы жапырақты көкөністер өсіретін GREEN ECO заманауи жылыжай кешеніне барды. Президентке кәсіпорында қолданылатын технологиялар мен өндірістік үдерістер таныстырылды.
Кешенде барлық өнім химиялық өңдеусіз, тыңайтқыштар мен пестицидтер қолданбай өсіріледі. Қазіргі уақытта кәсіпорында 160 адам еңбек етеді. Мұнда өндірілген өнімдер Қазақстанның 10 қаласына жеткізіліп, тұтынушыларға ұсынылады.
Сапар барысында Қасым-Жомарт Тоқаев «Лукоморье» тұқымбағы мен бақ орталығын да аралап көрді. Бұл – автоматтандырылған жүйе арқылы жылына 1,5 миллион түпке дейін ағаш, сәндік бұта мен гүл өсіруге қауқарлы еліміздегі ірі орталықтардың бірі.
Орталықта өсірілген өнімдер Қазақстанның барлық өңірінде сұранысқа ие. Сонымен қатар көшеттер мен сәндік өсімдіктер Өзбекстан мен Қырғызстанға экспортталады.
Мемлекет басшысына сондай-ақ Turanga сәндік өсімдіктер тұқымбағын құру аясында атқарылып жатқан жұмыстар туралы баяндалды. Жоба толық іске қосылған кезде мұнда 130 мыңға жуық ағаш және 3,5 миллион түп сәндік бұта өсіру жоспарланып отыр.
Президент өңірдегі заманауи агроөнеркәсіптік және экологиялық жобалардың даму барысымен танысып, олардың ішкі нарықты сапалы өніммен қамтамасыз етуге және экспорттық әлеуетті арттыруға қосатын үлесін атап өтті.
