Сот шешімімен Перизат Қайрат пен Ғайни Алашбаеваға Қазақстан Республикасы Қылмыстық кодексінің 190-бабының 4-бөлімі 2-тармағы (адамдар тобы болып аса ірі көлемде жасалған алаяқтық) және 218-бабының 3-бөлімі 3-тармағы (қылмыстық жолмен алынған қаражатты заңдастыру) бойынша кінә тағылып, оларды орташа қауіпсіз мекемеде жазасын өтеуге үкім етті. Сонымен қатар оларға 10 жыл бойы қайырымдылыққа қатысты кез келген қызметпен айналысуға тыйым салынды.
Бұған дейін мемлекеттік айыптаушы соттан Перизат Қайратқа 10 жыл, ал оның анасы Алашбаеваға 8 жыл бас бостандығынан айыру жазасын сұраған болатын.
Сот отырыстарында зардап шеккендер қатарында қайырымдылық қорларының өкілдері, кәсіпкерлер, педагогтер және жұмыссыз азаматтар бар екені анықталды. Тергеу мәліметінше, «BizBirgemiz Qazaqstan 2030» қоры арқылы азаматтар 30 мыңнан 200 миллион теңгеге дейін қаржы аударған.
