Павлодар облыстық төтенше жағдайлар департаментінің баспасөз қызметінің мәлімдеуінше, өрт туралы хабарлама сәрсенбі күні сағат 13:35-те түскен. Сәтбаев ауылдық округіне қарасты Шоқтау учаскесінде құрғақ шөп жанған.
Дала өртін сөндіруге Сәтбаев ауылының өрт сөндіру бекеті және ерікті өрт сөндіру құрылымының 30 адамы жұмылдырылды.
«Сонымен қатар Жаңажол ауылының маңындағы Тасбұлақ, Бүркітті, Қажыгелді учаскелерінде де құрғақ шөп өртенді. Тілсіз жау туралы 12:14-те хабар келіп түсті. Өрт 40 гектар жерді шарпыды», — делінген хабарламада.
Дала өртін сөндіруге Павлодар облысы ТЖД-нің 4 қызметкері мен 1 техникасы, Жаңажол ауылының ерікті өрт құрамасынан 40 адам жұмылдырылды. Өрт сағат 17:20-да сөндірілді.
