Орталық сайлау комиссиясы бес саяси партиядан сайланған 145 Құрылтай депутатын ресми тіркеді.
ОСК төрағасы Нұрлан Әбдіров «Қазақстан Республикасының Құрылтайы және оның депутаттарының мәртебесі туралы» Конституциялық заңның 44-бабына сәйкес, депутаттардың өкілеттігі Орталық сайлау комиссиясында тіркелген сәттен басталатынын атап өтті.
Комиссия отырысында ОСК төрағасының орынбасары Мұхтар Ерман сайлау қорытындысы бойынша баяндама жасады. Оның айтуынша, Орталық сайлау комиссиясы Құрылтайға өткен бес саяси партияның 145 депутатын тіркеу туралы тиісті қаулылар әзірлеген.
Мандаттар партиялар арасында мынадай тәртіппен бөлінді:
- «Әділет» партиясы – 110 депутат;
- Жалпыұлттық социал-демократиялық партия – 8 депутат;
- «Ауыл» партиясы – 10 депутат;
- Қазақстанның «Ақ жол» демократиялық партиясы – 8 депутат;
- Respublica партиясы – 9 депутат.
Нұрлан Әбдіров жаңадан сайланған депутаттардың өкілеттігі ресми тіркеуден өткен сәттен бастап күшіне енгенін мәлімдеді.
«Сіздердің өкілеттіктеріңіз Орталық сайлау комиссиясында тіркелген сәттен басталды. Енді сіздер – елдегі заң шығарушы билікті жүзеге асыратын жоғары өкілді орган – Қазақстан Республикасы Құрылтайының депутаттарысыздар. Депутаттық мандат – халықтың сенімі мен таңдауының нәтижесі. Ал Құрылтай депутатының мәртебесі әрқайсыңызға еліміз бен халқымыздың алдында үлкен жауапкершілік жүктейді», – деді ОСК төрағасы.
Ол Құрылтай депутаттарының төте сайлау құқығы негізінде сайланғанын және сайлау науқанының барлық кезеңі заңнама талаптарына сәйкес ұйымдастырылғанын атап өтті.
Отырыс қорытындысында Нұрлан Әбдіров жаңадан тіркелген Құрылтай депутаттарына депутаттық куәліктері мен төсбелгілерін табыстады.
