Күні кеше ОА мемлекеттері басшыларының IV консультативтік кездесуі болды.
Жиында ҚР Президенті: «Қазақстан «Мазари — Шариф – Кабул – Пешевар» бағытындағы теміржол құрылысына атсалысуға әзір. Нақты айтқанда, теміржол құрылысына қажетті материалдармен қамтамасыз етіп, вагондар ұсына аламыз. Өз тарапымыздан серіктестерімізді Шығыс Азия мен Парсы шығанағы елдерін байланыстыратын ең қысқа бағыт «Қазақстан – Түрікменстан – Иран» теміржолын белсенді пайдалануға шақырамыз», — деді.
Осыған байланысты Асхат Қасенғали өз парақшасында: «Ауғанстанда тұрақтылық орнаса, «Мазари — Шариф — Кабул — Пешевар» бағыты бойынша экономиканың бір күретамыры іске қосылар еді. Транскаспий бағытын тиімді қолдануға болатыны да кездесуде айтылды. Назар аударатын болсақ, бұл бағыттардың барлығы да Ресей аумағынан тыс жатыр және ОА елдері Ресей аумағымен өтетін бағыттың бәрі саяси рычагқа айналатынын жақсы түсінген», — деп жазды.
Саясаттанушының пікірінше, Ресейдің, әсіресе, транзиттік жолдарды жабу арқылы қысым көрсетіп отырғаны ешкімнен жасырын емес. Мысалы, Каспий құбыр консорциумының жұмысын 30 күнге тоқтатып, ертесі күні сот шешімі өзгеріп, айыппұл төлеуге алмастырылды. Бұның өзі — қысым, саяси рычаг еді.
