Ауыл 30 жыл бойы газсыз, мектепсіз, балабақшасыз, жолсыз, интернетсіз және жарықсыз өмір сүріп келеді.
Жаһанданудың ешқандай белгісі жоқ ауыл бар. Алматы облысына қарасты «Дәулет» елді мекенінің тұрғындары өркениеттен шет қалдық деп налиды. Олар орталық әлі күнге дейін газбен жабдықталмағанын айтады. Ауылдың бұдан да басқа проблемалары шаш етектен, деп хабарлайды Alataunews.kz ақпараттық агенттігі.
Билікке жүгіну нәтижесіз болғандықтан ауыл тұрғындары жанайқайларын шағын фильм арқылы жеткізуді ұйғарды.
«Біз бұл мәселені 20 жылдан бері шеше алмай келеміз. Бізде газ жоқ. Оны 2018 жылдан бері жүргізуге уәде беріп келеді. Ауылда 5000 адам бар. Біз 30 жыл бойы газсыз, мектепсіз, балабақшасыз, жолсыз, интернетсіз және жарықсыз өмір сүріп келеміз. Бізді ешкім керек етпейді. Бұл қашанға дейін жалғаспақ? Биліктің ұяты бар ма?», — деген сұрақ қойды ауыл тұрғыны Тамара Егізбекқызы.
Ауыл халқы өздерін көштен қалып қойған жұрттай сезінеді. Шағымдарын айтып, сан мәрте сабылып жауаптыларға барғанмен, нақты жауап болмапты.
