Кездесуге елорда тұрғындары ғана емес елдің бірнеше аймағынан келген азаматтар да қатысты. Оппазициялық партия өкілі әуелі сайлауалды бағдарламасын таныстырды. Артынша, жиналғандардың мәселесіне құлақ түріп, сұрақтарына жауап берді.
Жиында баспана бағасы, ауыл шаруашылығының жайы көтерілді. Балалары үш ауысымдық мектепте оқитын ата-аналар да шағымын жеткізді.
Күні бүгінге дейін Нұрлан Әуесбаев пен жақтастары елдің 8 өңірін аралап шықты.
«Кездесуде көп халық жиналды. Олар өздерінің қызықтырып тұрған үлкен мәселелері бар. Сондай-ақ бұл кездесуге облыстың түкпір-түкпірінен шаруалар келген. Олар өз мәселелерін айтып жатыр. Мынау пайщиктердің мәселесі, онсыз да біз бұрын біздің партия осы мәселелермен айналысып жүрген. Соған келіп өз шағым-өтініштерін айтып жатыр. Олардың бәрін қабылдап, біз тиісті жауабымызды беріп жатырмыз», − деді президенттікке кандидат Нұрлан Әуесбаев.
Айта кетейік, сайлау алдындағы үгіт-насихат 2022 жылғы 21 қазанда басталды және сайлаудан бір күн бұрын, яғни 19 қарашада аяқталады. 19 қараша – республика бойынша тыныштық күні. Ал, 20 қарашада президент сайлауы өтеді.
