Танымал боксшы өзінің Instagram парақшасында 40 баланы мектепке дайындағаны туралы бөлісіп, көпшіліктің алғысына бөленді.
Бұған дейін Назым әлеуметтік желі арқылы бірінші сыныпқа баратын балалардың ата-аналарынан байланыс нөмірлерін сұраған болатын. Қайырымды бастамасын іле-шала іске асырған спортшы 40 оқушының мектепке қажетті құрал-жабдықтарын алып беріп, көпбалалы ата-аналардың жүгін жеңілдетті.
«Жаттығудан кейін өзіме тәнті болып келе жатырмын. Минус 2 миллион, 40 бақытты бала + күлімдеген көпбалалы ата-аналар. Жақсылық санмен емес, жүрекпен өлшенеді», — деп жазды ол әлеуметтік желідегі парақшасына.
Спортшының бұл бастамасы жұртшылық тарапынан кең қолдау тауып, игі істің жалғасын табуына серпін берді. Назым Қызайбайдың бұл әрекеті – нағыз ел жанашырына тән өнеге. Ол тек спортта ғана емес, қоғамға деген жанашырлығымен де жастарға үлгі болып отыр.
Қазіргі таңда ел ішінде осындай қайырымды істердің кеңінен насихатталып, қоғамда игілікке ұмтылатын жандардың көбейіп келе жатқаны қуантады. Назым Қызайбайдың бұл бастамасы соның айқын дәлелі.
