Әлем чемпионы атағы сарапқа салынатын шешуші ойындағы басты интрига – аңызға айналған Лионель Месси мен испан футболының жас жұлдызы Ламин Ямальдың текетіресі.
Финалдық кездесу АҚШ-тың Нью-Джерси штатындағы Ист-Ратерфорд қаласында орналасқан MetLife Stadium стадионында өтеді. Матч Қазақстан уақыты бойынша 20 шілде күні сағат 00:00-де басталады. Кездесуді Qazaqstan және Qazsport телеарналары тікелей эфирде көрсетеді.
Месси бұл кездесуде өз мансабындағы екінші әлем чемпиондығын жеңіп алуға талпынса, Ламин Ямаль алғаш рет әлем чемпионы атану мүмкіндігіне ие болып отыр. Сондықтан бұл финал тек екі құраманың ғана емес, екі буынның текетіресі ретінде де бағалануда.
Өзара кездесулер тарихы
Аргентина мен Испания әлем чемпионаттары тарихында бұған дейін бір-ақ рет кездескен. Бұл 1966 жылғы мундиальда болған. Топтық кезеңдегі ойында аргентиналықтар 2:1 есебімен жеңіске жетіп, Испания құрамасының жарысты ерте аяқтауына себепкер болды.
Одан кейін екі команда алты жолдастық матч өткізді. Оның үшеуінде Испания, екеуінде Аргентина жеңіске жетсе, бір кездесуде тең нәтиже тіркелген жоқ. Соңғы рет құрамалар 2018 жылы кездесіп, Испания қарсыласын 6:1 есебімен ойсырата жеңген еді.
Финалға дейінгі жол
Аргентина құрамасы әлем чемпионатының топтық кезеңінде Алжирді (3:0), Австрияны (2:0) және Иорданияны (3:1) жеңіп, J тобында бірінші орын алды.
Плей-офф кезеңінде Кабо-Вердені (3:2), Мысырды (3:2), Швейцарияны (3:1) және Англияны (2:1) жеңіп, финалға жолдама алды.
Ал Испания H тобында Кабо-Вердемен тең ойнап, кейін Сауд Арабиясы мен Уругвайды жеңіп, топ көшбасшысы атанды.
Плей-оффта испандар Австрияны (3:0), Португалияны (1:0), Бельгияны (2:1) және жартылай финалда Францияны (2:0) ұтып, финалға дейін жетті.
Айта кетейік, үшінші орын үшін өткен кездесуде Англия Францияны 6:4 есебімен жеңді. Сол матчта Килиан Мбаппе әлем чемпионаттары тарихындағы үздік сұрмерген атанды.
Ал финал қарсаңында Лионель Месси Испанияға қарсы шешуші ойын туралы пікір білдіріп, әлеуметтік желілерде кең тараған, сәби Ламин Ямальды шомылдырып тұрған әйгілі фотосына қатысты да өз ойын ортаға салды.
Енді футбол әлемінің назары MetLife Stadium аренасына аумақ. Миллиондаған жанкүйерді толғандырған басты сұрақ – әлем кубогын тәжірибелі Лионель Месси тағы бір мәрте көтере ме, әлде жаңа дәуірдің символына айналған Ламин Ямаль алғашқы чемпиондық атағын жеңіп ала ма?
