Қырғызстанда өткен VI Дүниежүзілік көшпенділер ойындарында Данил Устинов қол күрестен сынға түсіп, алтын медаль иеленді. Осылайша ол халықаралық аренада Қазақстанның ғана емес, туған қаласы Қонаевтың да мерейін үстем етті.
Елге оралғаннан кейін спортшы Қазақстан Президенті Қасым-Жомарт Тоқаевтың қабылдауында болып, Мемлекет басшысының қолынан «Ерен еңбегі үшін» медалін алды.
Бүгін Қонаев қаласының әкімі Асхат Бердіханов Данил Устиновты жеке қабылдап, жетістігі үшін алғыс білдірді.
«Сіз секілді спортшылар еліміздің, қаламыздың даңқын асқақтатып жүр. Барша Қонаев тұрғындары атынан сізге алғысымды айтамын. Бағындырар белестеріңіз көп болсын! Тек сәттілік тілеймін!» – деді Асхат Бердіханов.
Кездесу барысында қала әкімі спортшының халықаралық аренадағы жетістігін жоғары бағалап, оған 1 млн теңге көлеміндегі сертификатты табыс етті.
Данил Устиновтың бұл жеңісі – Қонаев спорты үшін де елеулі жетістік. Әлемдік деңгейдегі додада топ жарған спортшы енді ел намысын алдағы халықаралық жарыстарда қорғауды жалғастырады.
