Көліктегі полиция департаментінің қызметкерлері 2024 жылдың алғашқы 10 айында Қазақстанның көші-қон заңнамасын бұзған 3 022 шетел азаматын әкімшілік жауапкершілікке тартты, деп хабарлайды alataunews.kz.
Оның ішінде сот шешімімен 977 шетелдік елден шығарылып, қос азаматтығы бар 375 тұлға анықталған.
Мысалы, Алматы әуежайындағы көші-қон қызметі ҚР ҰҚК шекара қызметімен бірлесіп, 32 жастағы АҚШ азаматының қос азаматтықпен Қазақстан Республикасының заңнамасын бұзғанын анықтады. Әйел шетел азаматтығын алғанын белгіленген мерзімде хабарламағаны үшін әкімшілік жауапкершілікке тартылып, сот шешімімен бес жылға елге кіруге тыйым салынды.
Сонымен қатар, Ресей Федерациясының үш азаматының қос азаматтықпен заң бұзғаны анықталды. Сот шешімі бойынша олардың екеуі Қазақстаннан шығарылып, біреуі 200 АЕК мөлшерінде айыппұл салынды.
