«Көктөбе» саябағы әкімшілігінің хабарлауынша, фуникулерлердің тоқтауына электрмен жабдықтау жүйесіндегі ақау әсер еткен. Осыған байланысты аспалы жолдың қозғалысы уақытша тоқтатылып, қауіпсіздік талаптарына сәйкес жолаушыларды эвакуациялау жұмыстары жүргізілді.
«Алатау Жарық Компаниясы» АҚ мәліметінше, сағат 14:45-те электрмен жабдықтау толық көлемде қалпына келтірілген.
Қала әкімдігінің мәліметіне сәйкес, электр қуаты берілгеннен кейін кабиналардағы барлық жолаушы қауіпсіз түрде түсірілді.
«Электрмен жабдықтау қалпына келтірілгеннен кейін барлық жолаушы эвакуацияланды. Қазіргі уақытта фуникулерлер жолаушыларды уақытша қабылдамайды. Барлық техникалық тексеру аяқталып, пайдалану қауіпсіздігі толық расталғаннан кейін аспалы жолдың жұмысы қайта жанданады», – делінген әкімдік хабарламасында.
Қазіргі уақытта оқиғаның нақты себептері анықталып жатыр. Мамандар аспалы жолдың техникалық жай-күйін толық тексергенге дейін жолаушылар тасымалы уақытша тоқтатылған. Қала билігі бұл шешім жолаушылардың қауіпсіздігін қамтамасыз ету мақсатында қабылданғанын атап өтті.
Оқиға салдарынан зардап шеккендер туралы ақпарат жарияланған жоқ.
