ІІМ мәліметінше, арнайы операция 28 мамыр күні Киев қаласында өткен. Тергеу барысында аталған call-орталықтардың Еуропа мен ТМД елдерінде синтетикалық есірткі өндіру және таратумен айналысқан қылмыстық ұйымның мүддесіне жұмыс істегені анықталған.
Құқық қорғау органдарының мәліметіне сәйкес, орталық қызметкерлері интернет пен түрлі байланыс арналары арқылы адамдарды заңсыз есірткі бизнесіне тартқан. Олар Қазақстан аумағында есірткі жасырушыларды, тасымалдаушыларды және есірткіні ораумен айналысатын адамдарды іздеп, жұмысқа қабылдаумен айналысқан.
«Арнайы операция нәтижесінде 11 адам ұсталды. Олардың қатарында ұйымдастырушылар, операторлар және адамдарды заңсыз жұмысқа тартумен айналысқан қызметкерлер бар. Тоғыз мекенжай бойынша тінту жүргізіліп, шамамен 40 мың АҚШ доллары, 10 мың еуро, Range Rover автокөлігі, 18 ұялы телефон, 12 ноутбук пен планшет тәркіленді», – деді ҚР ІІМ Есірткі қылмысына қарсы іс-қимыл комитеті төрағасының орынбасары Елдар Әбдікенов.
Ведомствоның хабарлауынша, қазіргі уақытта тәркіленген техникадағы ақпараттарға талдау жүргізіліп жатыр. Тергеушілер ұйымдастырушылардың аккаунттарын анықтап, олардың қаржылық операцияларын тексеруге кіріскен.
Құқық қорғау органдары бұл халықаралық есірткі трафигіне қарсы күрес аясындағы маңызды операциялардың бірі екенін атап өтті. Тергеу жалғасып жатыр.
