Бір қызығы, қос әкім де аудан басшылығына 2023 жылы келген. Үш жылға жуық уақыт аудан басқарған екі мемлекеттік қызметшінің еңбек жолы әртүрлі болғанымен, екеуіне ортақ бір ерекшелік бар – жергілікті жердегі жұмысты жақсы біледі.
Олимпиада жүлдегерінен аудан әкіміне дейін
Нұрбақыт Теңізбаев 1983 жылы дүниеге келген. Еңбек жолын 2001 жылы Қазақстан Республикасының грек-рим күресі федерациясында спорт нұсқаушысы болып бастаған.
Кейін Астана қаласындағы Ұлттық штаттық командалар және спорт резерві дирекциясында грек-рим күресінен спорт нұсқаушысы болып еңбек етті. Қазақстан Республикасының ішкі істер органдарында қызмет атқарып, Алматы қаласының дене шынықтыру және спорт басқармасына қарасты №12 олимпиадалық резервтегі мамандандырылған балалар мен жасөспірімдер мектебінде әдіскер, директордың оқу-спорт жұмыстары жөніндегі орынбасары болды. Сондай-ақ Алматы облыстық жоғары спорт шеберлігі мектебін басқарды.
2018 жылдың қазан айынан бастап Алматы облысының дене шынықтыру және спорт басқармасының басшысы қызметін атқарды. Ал 2023 жылы Кеген ауданының әкімі болып сайланды.
Нұрбақыт Теңізбаев – спорт әлеміне таныс тұлға. Ол грек-рим күресінен 2003 жылы Ыстанбұлда өткен жастар арасындағы әлем чемпионатында топ жарған. 2008 жылғы Бейжің Олимпиадасының күміс жүлдегері, 2009 жылғы әлем чемпионатының қола жүлдегері және Азияның екі дүркін чемпионы. Қазақстанның еңбек сіңірген спорт шебері, «Құрмет» орденінің иегері.
Спорттағы мансабынан кейін мемлекеттік қызметке ауысқан ол облыстық деңгейден аудан басшылығына дейінгі жолдан өтті. Кеген ауданын басқарған кезеңде ауылдық елді мекендердің инфрақұрылымы, туризм, ауыл шаруашылығы және әлеуметтік мәселелер оның жұмысының негізгі бағыттарының қатарында болды.
Ауылдық округтен облыстық басқармаға дейін
Ұйғыр ауданын басқарған Бота Елеусізованың еңбек жолы жергілікті мемлекеттік басқару жүйесімен тікелей байланысты.
Ол 1975 жылғы 16 қаңтарда Алматы облысының Кеген ауданында дүниеге келген. Екі жоғары білімі бар. Мемлекеттік қазақ ауыл шаруашылығы институтын және Қазақ мемлекеттік қыздар педагогикалық институтын тәмамдаған.
Еңбек жолында Еңбекшіқазақ ауданы Түрген ауылдық округі әкімі аппаратында маман, бас маман қызметтерін атқарды. Кейін Түрген ауылдық округі әкімінің орынбасары, одан соң осы ауылдық округтің әкімі болды.
Бұдан кейін Кеген ауданы әкімінің орынбасары қызметін атқарып, аудандық деңгейдегі басқару тәжірибесін жинақтады. 2022 жылдан бастап Алматы облысының ішкі саясат басқармасын басқарды. 2023 жылы Ұйғыр ауданының әкімі болып тағайындалды.
Осылайша, Бота Елеусізованың мемлекеттік қызметтегі еңбек жолы ауылдық округтен басталып, аудан және облыстық деңгейге дейін жалғасты.
Жергілікті жердің мәселесін білетін депутаттар
Теңізбаев пен Елеусізованың Құрылтайға баруының бір ерекшелігі – екеуі де өңірлердегі мәселелермен тікелей жұмыс істеген басшылар. Ауылдағы жол мен ауыз судан бастап, жайылым, жұмыссыздық, кәсіпкерлік, білім, денсаулық сақтау және инфрақұрылым мәселелеріне дейін жергілікті билік күн сайын бетпе-бет келетін түйткілдерді олар тәжірибеде көрді.
Сондықтан енді олардың алдында сол тәжірибені заң шығару жұмысында пайдалану міндеті тұр. Жергілікті жердегі мәселенің қалай туындайтынын ғана емес, оны шешуге қандай әкімшілік немесе заңнамалық кедергілер әсер ететінін білетін депутаттардың Құрылтайдағы жұмысы өңірлер үшін маңызды болуы мүмкін.
Кеген мен Ұйғырды кім басқарады?
Екі әкімнің Құрылтайға кетуімен бірге Алматы облысында енді Кеген және Ұйғыр аудандарына жаңа басшылардың кім болатыны өзекті мәселеге айналды.
Әсіресе Кеген ауданына келетін жаңа әкімге артылар міндет аз емес. Соңғы жылдары ауданда туризм мен ауыл шаруашылығын дамыту, инфрақұрылымды жаңарту бағытында бірқатар бастама қолға алынды. Кегеннің табиғи және туристік әлеуетін ескерсек, жаңа басшыға басталған жобалардың сабақтастығын сақтап қана қоймай, аудан экономикасына жаңа серпін беру қажет.
Ұйғыр ауданында да ауыл шаруашылығы, кәсіпкерлік, әлеуметтік инфрақұрылым және елді мекендерді дамыту бағытындағы жұмыстарды жалғастыру міндеті тұр.
Нұрбақыт Теңізбаев пен Бота Елеусізова үшін аудан әкімінің қызметі аяқталғанымен, өңірлермен байланысы үзілмек емес. Кеше тұрғындардың мәселесін атқарушы билік өкілі ретінде шешсе, енді сол мәселелерді елдің заң шығарушы органында көтеруге мүмкіндік алды.
Ал Кеген мен Ұйғыр аудандарының тұрғындары үшін әзірге басты сауалдың бірі ашық: екі ауданға енді кім әкім болады?
