Ауданда ирригациялық каналдардың болмауынан суармалы судың жетіспеушілігі кегендіктерді тығырыққа тіреумен келеді. Айта кетейік, мұнда 9198 га суармалы жер бар. Бұл мәселе аудан тұрғындары тарапынан жергілікті атқарушы билікке айтылып та келеді.
«Бұл бір ғана Кеген емес, Іленің бойындағы көптеген елді мекендердегі мәселе. Су шығыны көп болып тұр. Суды үнемсіз пайдаланғандықтан шығын қазір 60%-ға жетті. Соны болдырмау үшін жұмыстар жасап жатырмыз», — деді Марат Сұлтанғазиев.
Қазіргі уақытта ауданның ирригациялық каналдарын және жайылымдарды суландыру құдықтарын қалпына келтіру үшін республикалық бюджеттен 2,8 млрд. теңге бөлінді. Бұл жоба 2024 жылға дейін жалғасады. Нәтижесінде 8,9 мың гектар суармалы жер қалпына келтіріліп, айналымға енетін болады.
