Кеген ауданында 34 елді мекеннің 31 немесе 91,2 пайызы орталықтандырылған сумен қамтамасыз етілген. Су құбыры желілерінің жалпы ұзындығы 221 шақырымды құрайды, алайда оның 48 пайызы тозған. Биылғы жылдың жоспарына сәйкес, Ақтасты ауылында құрылыс жұмыстары аяқталып, Шырғанақ және А. Нүсіпбеков ауылдарының сумен жабдықтау жүйелеріне құрылыс жұмыстары басталуы тиісті.
Бөлексаз ауылында 2020 жылы басталған күрделі жөндеу жұмыстары 2021 жылдың қазан айына аяқталу керек еді. Алайда, мердігердің салғырттығынан жұмыс уақытында бітпеген. Сот шешімімен мердігерге жұмысты 2022 жылдың 30 маусымына дейін тапсыру міндеттелген. Қазір жұмыстың 95 пайызы аяқталған.
Бұдан басқа, қазір Кеген ауылы тұрғындарының 40%-ы сумен жабдықтау жүйесіндегі қысымның жеткіліксіз болуына байланысты ауыз суды өз бетінше жеткізумен айналысатыны белгілі болды, сонымен қатар, кегендіктер құрылыс-монтаждау жұмыстарының сапасыз жүргізілуіне наразылығын білдіріп жатыр. Тұрғындармен кездескен облыс басшысы Марат Сұлтанғазиев ауыз су мәселесі шешілетінін, нақты жұмыстар атқарылатынын айтты.
