Аудан әкімдігінің мәліметінше, биыл 14,6 мың гектардан астам жерге дәнді дақылдар, 7,3 мың гектарға майлы дақылдар, 745 гектарға картоп, 1 623 гектарға көкөніс, 542 гектарға бақша өнімдері және 28 мың гектардан астам аумаққа мал азықтық дақылдар егілген.
Қазіргі уақытта масақты дәнді дақылдарды жинау жұмыстары қарқынды жалғасуда. Осы күнге дейін 10 139 гектар алқап орылып, оның ішінде 4 150 гектар күздік бидай және 5 989 гектар күздік әрі жаздық арпа жиналды. Жалпы астық түсімі 18,4 мың тоннаны құрады.
Сонымен қатар көкөніс пен бақша өнімдерін жинау да жалғасып жатыр. Бүгінге дейін 421 гектар алқаптан 13,1 мың тонна өнім жиналды.
Аудандағы ірі шаруашылықтардың бірі – «ЖЕР-КАНАТЫ» ЖШС. 2003 жылы құрылған кәсіпорын бүгінде аралас ауыл шаруашылығымен, оның ішінде егін шаруашылығымен айналысады.
Шаруашылықтың жалпы жер көлемі 1 600 гектарды құрайды. Биыл мұнда 200 гектар күздік бидай, 60 гектар күздік арпа және 400 гектар мақсары егілді. Жалпы егіс алқабы – 660 гектар. Кәсіпорында бес адам тұрақты жұмыспен қамтылған.
