Оның айтуынша, 2026 жылғы 1 қаңтардан бастап Қазақстан Республикасы Қылмыстық кодексінің 301-бабына сәйкес күшті әсер ететін заттардың заңсыз айналымы үшін қылмыстық жауапкершілік енгізілген.
«Мұндай заттардың қатарына жастар арасында «көңіл көтеретін газ» ретінде белгілі азот оксиді де енгізілген», – деді Бақытжан Әмірханов.
Министрлік өкілі ІІМ қызметкерлері түнгі клубтар мен ойын-сауық орындарында тыйым салынған заттарды анықтау және олардың таралуының жолын кесу мақсатында тұрақты түрде рейдтік іс-шаралар жүргізіп келетінін айтады.
Жыл басынан бері республика бойынша азот оксидінің заңсыз айналымына қатысты 49 дерек тіркелген. Нәтижесінде 1,5 мыңнан астам баллон мен екі автоцистерна тәркіленген.
«Көрші мемлекеттен «көңіл көтеретін газды» жеткізу арнасы жойылды. Аталған фактілердің барлығы бойынша қылмыстық істер қозғалды», – деді комитет өкілі.
Сондай-ақ Бақытжан Әмірханов күшті әсер ететін заттардың заңсыз айналымына қатысты алғашқы сот үкімдерінің бірі заңды күшіне енгенін айтты. Сот шешімі бойынша кінәлі тұлға сегіз жылға бас бостандығынан айырылған.
Осыған байланысты Ішкі істер министрлігі азаматтарды, әсіресе түнгі ойын-сауық орындарының иелері мен әкімшілерін азот оксидін таратуға жол бермеуге шақырды.
«Тыйым салынған заттарды тасымалдауға, сақтауға және өткізуге қатысы бар барлық адамдар заң аясында жауапкершілікке тартылады», – деп ескертті Бақытжан Әмірханов.
