Сычуан университетінің ғалымдары пластик қоқыс ыдыраған соң түзілетін микропластиктің қалдықтарын «жейтін» ерекше балық жасап шығарды.
Болашақта бионикалық машина әлемдегі мұхит суын тазартуға көмектеседі деп күтілуде. Ұзындығы бір жарым сантиметрді құрайтын құрылғы сырттай қарағанда кәдімгі балыққа ұқсайды және оған инфрақызыл сәуле бағытталса, қозғалады.
«Микропластик ауыр металл сынды зиянды заттарды тартатын кеуекті құрылымнан тұратыны белгілі. Бұл оның уыттылығын одан сайын күшейте түседі. Ол әдеттегі пластикке қарағанда адамға көбірек зиян тигізеді. Сондықтан осы проблемамен күресуді қолға алдық», — дейді роботты әзірлеген ғалымдар.
Робот пластик қоқыс ыдыраған соң түзіліп, адам организміне зиянын тигізетін микропластиктің қалдықтарын жинайды.
